Senderismo y BTT

Fonz se localiza a las estribacións de la Serra de la Carrodilla, a una altura de 471 metros. L’entorno natural presenta un paisache diverso, con múltiplles ecosistemas dende es campos de secano —on s’i cultiva cereal, almendrera y olivera— hasta l’abundancia de vechetación y masa boscosa —formada per pinos, carrascas, buixos, caixigos y sabinas— que apareix a las laderas, especialment a Palau, on podem trobá-ie abundants manantials. Tot este entorno é un marco ideal pa la práctica del senderismo u la biciclleta de montanya. Per ell transcurren diversos senderos senyalizaus, como:

 

GR-18, Senderos de La Ribagorza

Encomenza a Fonz y arriba hasta la localidat ribagorzana d’Aneto. S’i troba senyalizau de tot.

GR-23, Senderos de la Llitera Alta

Este itinerario principa a la Basa Fechinas, al término municipal de Fonz, y recorre la Llitera Alta hasta Albelda.

PR Hu-197

Une Fonz con la localidat de Zanui, y conta con una lonchitut de 7 quilómetros.

Sendero Joaquín Costa. Un sendero senyalizau que une las localidaz de Monzón y Estada pasant per Fonz. El trayecto complleto tiene una lonchitut de 37 quilómetros, y mos descubre una gran obra d’incheniería civil, el Canal d’Aragón y Catalunya.

    

Fonz-Cofita

É un sendero senyalizau, de 5 quilómetros y nivell baixo de dificultat, que discurre entre campos de cultivo y enllaza los núcllios de Fonz y Cofita. Es cereals y las almendreras predominan al primé tramo del camino; a la resta, i trobarem fruitals y vinyas de la Denominación d’Orichen Semontano.

Cofita-Soto d’Ariéstolas

É un itinerario circulá de nivell baixo de dificultat. El circuito complleto tiene bells 9 quilómetros, y encomenza al canto del llavadó del llugá. Tot recorrent-lo, i podrem observá la fauna y la fllora representativa del ríu Cinca, que, a este tramo, se contan entre las millós conservadas d’Aragón.

 

A lo llargo d’estes senderos, i trobarem numbrosos manantials y construccións relacionadas con l’uso y aproveitamento de l’aigua, como el Pozo el Chelo, la Mina Flores u l’Ojo la Fuente.

 

Pozo el Chelo

L’aigua canalizada dende l’Ojo la Fuente se dixaba chelá en basas de poca profundidat y, dimpués, se chitaba al pozo. Está construiu en pedra, é de pllanta circulá, y tiene un diámetro de 4 metros per 10 d’altura.

La Mina Flores

É una galería subterránia de 162 metros de lonchitut, que va excavá-se pa conducí l’aigua dende l’Ojo la Fuente hasta Fonz. La obra no va finalizá-se, faltant-ie bells 238 metros per perforá.

L’Ojo la Fuente

Este manantial subterránio é el que, tradicionalment, ha abasteciu d’aigua la localidat. S’i accede baixant unas chicotas escaleras a l’interió de la caseta d’aiguas de Fonz. En dentrá-ie, s’observa una sala-estancia abovedada, con totas las parez de pedra, per on i mana l’aigua a una temperatura de 14ºC. A poca distancia, a la zurda del camino, i trobam una pintoresca fuent, instalada al tronco d’una olivera centenaria.

Ermita de Sant Chusé

Situada a un tozal, a bells 2 quilómetros de la pobllación. É uno d’es millós miradós pa disfrutá de l’entorno de Fonz. A metat de camino, i ha un esbarre que mos conduce hasta el miradó de Santa Bárbara, on mos ie trobarem un pilá con la imachen de la Santa y disfrutarem d’unas vistas excelents de la Vall del Cinca.