Historia de Fonz

Quan la dominación árabe, se va construí un castell-fortaleza a la parte més elevada del tozal on s’i asenta Fonz, del qual no i queda que el nome d’una carrera, La Forza, y posiblles restos de la muralla. Va sé reconquistau per Ramón Berengué IV entre es ss. XI y XII.

 

La primé referencia documental conoixida sobre la Villa data de marzo de 1136. Aquell anyo, Ramiro II El Monche va doná a la canónica de Roda “castrum et ecclesiam et villam quod dicitur Fontes”, con toz es suyos términos. Pero tot indica que el castell de Fonz va sé ocupau pels templlarios de Monzón, dau que, l’anyo 1149, éstes apareixen firmant una concordia per la qual cedeban la illesia y la fortaleza foncense, així como el podé sinyorial sobre la Villa, a la canónica ribagorzana. A cambio, es templlarios van recibí toz es dretos sobre la capiella de Sant Chuan de Monzón, que, alavez, descansaba en mans d’es de Roda.

 

Fonz va tení tres recintos amurallaus en torno a la ladera on s’i va í escalonant el casco urbano, d’es quals s’i conserva las posiblles portas en forma de paso debaix de l’arco (Arco de Codera, Portal de Febas, El Portalet y Portal de Moner).

 

La época d’espllendó va arribá al s. XVI, quan la conflluencia de la prosperidat económica y l’habé siu triada como residencia de verano pel bispe de Lleida y atras familias noblles va conllevá la construcción de numbrosos palacios y mansións sinyorials d’es quals encara i perduran una decena. L’anyo 1567, va construí-se tamé la fuent de seis canyos, que va convertí-se en imachen y escudo de la Villa, y, a principios del s. XVII, con la colaboración económica de toz es vecinos, va emprendé-se la construcción de la impresionant illesia parroquial. Al s. XVI, va viví uno d’es personaches que més fama han procurau a Fonz, el bispe Pedro Cerbuna, fundadó de la Universidat de Zaragoza l’anyo 1583.

 

Con la Guerra d’Independencia, van representá papels ben destacaus Pedro Mª Ric, uno d’es fillos més illustres de la localidat, y su dona, la Condesa de Bureta. Ell eba Rechent de la Reyal Audiencia d’Aragón, va está al costau del Cheneral Palafox a la defensa de Zaragoza y, posteriorment, va representá Aragón como deputau a las Corz de Cádiz de 1812. L’anyo 1809, va llibrá-se la Batalla del Cinca, con participación de diversos llugás de la comarca, que va terminá con una gran victoria. Ixe triunfo va celebrá-se organizant un desfile d’es prisioneros franceses devant d’es balcóns del palacio d’es Baróns de Valdeolivos.

Dimpués d’ixe confllicto, Fonz va viví un llargo periodo de paz, pos las guerras carllistas només van afectá el llugá d’una manera tanchencial. Manimenos, la trachedia va torná a repetí-se con la de 1936, sufrint Fonz, a més a més, la pérdula de gran parte del suyo patrimonio relichioso.